أنا بحب (كثير جدًا) أحضر مسلسلات عربي، وخاصة في رمضان، ولو الوقت بسمحلي ما عنديش مشكلة اتابع عشر-عشرين مسلسل في رمضان، وما عنديش مشكلة أحضر ٣-٤ مسلسلات بنفس الوقت، كيف؟ أتنقل بيناتهم وقت الدعايات، عادة بتزبط معي. بقول بس ٣-٤، لانه هناك مرات حاولت اتابع أكثر ولما كنت اقلب وبدي أرجع لواحد منهن انسى عأي محطة ويروح علي.
وأحيانا ممكن أبلش أتابع مسلسل من الحلقة العاشرة أو ال ١٥ أو حتى ال ٢٩، وبفهمه وبصير أتابعه، وممكن كمان أحضر حلقة وأفوت حلقات وأرجع أتابعه. وممكن أكون اقلب بالمحطات، ألاقي مسلسل عربي، أحضر حلقة وحدة عشوائيا وخلص، واعتبر نفسي حاضرته كله.
وعندي طموح إني في شي سنة، في شي رمضان، أكون فاضية لا شغلة ولا عملة غير إني أحضر كل المسلسلات كل الشهر.
#رمضان_كريم
#أهلا_رمضان
Abir Kopty's Blog مدوّنة عبير قبطي 