اليوم بالذات، مش مطلوب ابدا حدا يحَمِّل المسؤولية لحدا ولا يكيل الاتهامات لحدا. المطلوب الكل يكون مسؤول/ة:
*كل واحد ووحدة مسؤول في بيته ومع الناس اللي حواليه.
*يا ريت نمتنع عن التحريض عالفيسبوك وهذا يشمل مشاركة ستاتوسات محرضة بغرض انتقادها، يعني مثلا، لما تشارك/ي ستاتوس طائفي، هل بتفكر/ي انك هيك عم بتحارب الطائفية؟؟!
*تشاركش مقالات تحريضية من صحف مغرضة. تنبسطش انها ناشرة تحريض على “غريمك”… البلد اهم منها ومنك ومن غريمك.
*تعالوا نحكي عن مؤامرة التجنيد، عن العنف والسلاح، عن سياسة الاحتلال والعنصرية، تعالوا نحكي عن مخيم اليرموك المحاصر، تعالوا نتذكر مين عدوّنا الحقيقي، تعالوا نحكي عن اللي بوَحّدنا بدل اللي بفَرّقنا.
*لكل واحد/ة في موقع “مسؤول”، لما تطلع تصرِّح عالاعلام، خلّي عندك دم. العالم ما بدور حولك او حول حِزبك او حِقدك عالحزب الثاني. مصلحة البلد فوقك وفوق حزبك عمّي.
*اسال/ي حالك هالسؤال: “هل بدي اكون حجر شطرنج بايد الدولة؟” واذا الجواب “نعم” فيرجى التزوّد بطواشات ماء، لان التيار رح يجرفك، والسؤال لوين؟! اما اذا الجواب “لا”، معناه بدّك توقف بوجه التيار يا معلّم.
*اي تخريب او تكسير، هدفه يولع ويحرق البلد، حتى لو اللي عاملينه هدفهم يعبروا عن غضب، في ناس “فوق” راكبة عالموضوع منيح، وبدها تِسْكَر وتسَلطِن على حجار الشطرنج وهمي عم يتقاتلوا.
*دورك مش تتفرج، دورك ما تخافش تقول لابن/بنت بلدك “وقّف”، لما يكون شاطح علوحة الشطرنج!
*غمض عينيك واتخيل الكابوس اللي ممكن تعيشوا البلد! فتح عينيك وخذ دورك.
اذا ما صار اي شي وتجاوزنا الازمة: رح احرق هالتدوينة واكتب وحدة جديدة!
واسلمي يا ناصرة.
Abir Kopty's Blog مدوّنة عبير قبطي 
January 8, 2014 at 1:22 pm
يسلم تمك ياعبير شو عقلك راجح وحسك الوطني عالي
LikeLike